Comelec “All systems go” sa eleksiyon sa Lunes

“ALL SYSTEMS GO” na ang Commission on Elections (Comelec) para national and local elections (NLE) sa Lunes, 12 Mayo 2025.

Ayon kay Comelec Chairman George Garcia, ilang araw bago ang halalan ay halos 100% na ang delivery ng automated counting machines (ACMs).

Samantala, nagsimula kahapon ang delivery ng huling batch ng mga official ballots para sa National Capital Region (NCR), na aabot sa 7.5 milyon.

Ayon kay Garcia, una nilang naipamahagi sa mga treasurer’s office ng mga munisipyo at siyudad ang mga balota para sa iba pang rehiyon sa bansa nitong mga nakalipas na araw.

Nitong Martes, kabilang sa mga unang dinalhan ng mga balota ay ang Caloocan, Marikina, Pasig, Valenzuela, Quezon City, Malabon, Navotas, at San Juan cities.

Sisimulan ngayon Miyerkoles, 7 Mayo, ang shipping ng mga balota para sa Muntinlupa, Pateros, Taguig, Maynila, Makati, Pasay, Las Piñas, Mandaluyong, at Parañaque. Ihahatid ang mga official ballots sa treasurer’s office ng bawat lungsod.

Sa pangangasiwa ng electoral board members, ipamamahagi ang mga balota sa voting precincts na sisimulan sa Linggo, 11 Mayo, hanggang sa umaga ng araw ng halalan sa Lunes.