HATAW! D'yaryo ng Bayan hatawtabloid.com
TINUPOK ng apoy ang Bago City Elementary School, sa Brgy. Poblacion, lungsod ng Bago, lalawigan ng Negros Occidental, nitong Biyernes, 21 Marso.
Ayon kay Fire Officer 2 Joeman Alvarez, arson investigator ng Bago City Fire Station, tuluyang napinsala ng sunog ang apat na silid aralan at isang stock room ng eskuwelahan.
Nagkataong walang mga estudyante sa loob ng paaralan, dahil half-day ang klase noon, nang magsimula ang sunog dakong 3:45 ng hapon.
Tuluyang naapula ang sunog isang oras ang nakalipas at walang naiulat na nasugatan sa insidente.
Patuloy na tinutukoy ang dahilan ng sunog na nagdulot ng pinsalang tinatayang nagkakahalaga ng P3,000,000.
Ayon kay Alvarez, dahil pag-aari ng pamahalaan ang nasunog na estruktura, iimbestigahan ito ng Bureau of Fire Protection- Region 6 (Western Visayas).
Kinordonan ang apektadong bahagi ng paaralan para sa imbestigasyon at inaasahang hindi makaaabala sa mga klase.
Nabatid na itinayo ang paaralan noon pang dekada ‘60 at itinuturing na matandang estrukturang gawa sa mga light material.
