HATAW! D'yaryo ng Bayan hatawtabloid.com
DINAKIP ng mga awtoridad ang isang 33-anyos lalaking sangkot sa pagnanakaw at nahulihan ng baril nitong Sabado, 18 Enero, sa lungsod Quezon.
Kinilala ng mga operatiba ang suspek na si Raffy Radaza, 33 anyos, residente sa Brgy. Batasan Hills, sa nabanggit na lungsod.
Ayon sa ulat mula sa Batasan Police Station (PS 6), naglalakad ang biktima sa kahabaan ng IBP Road kanto ng Everlasting St., sa Brgy. Commonwealth, nang agawin ng suspek ang kaniyang mga gamit at tumakas sa hindi matukoy na direksiyon.
Nadakip si Radaza dakong 9:28 pm kamakalawa sa bahagi ng Filinvest II Road, kalapit ng DSWD.
Narekober ng pulisya mula sa suspek ang isang ID; isang unit ng Samsung Galaxy A8 na nagkakahalaga ng P5,000; isang coin purse; P800 cash; shoulder bag; isang kalibre .38 baril na walang serial number; apat na bala; at isang itim na kamiseta.
Nakatakdang sampahan ng kasong Robbery (Hold-up) at paglabag sa RA 10591 o Comprehensive Firearms and Ammunition Regulation Act kaugnay ng Omnibus Election Code sa Quezon City Prosecutor’s Office.
