‘High sa droga’ nagpaulan ng bala; 3 todas, 1 sugatan

PATAY ang tatlo katao habang sugatan ang isa pa matapos pagbabarilin ng isang lalaking pinaniniwalaang bangag sa ilegal na droga sa Brgy. Maribago, lungsod ng Lapu-Lapu, lalawigan ng Cebu, nitong Biyernes, 17 Enero.

Kinilala ng pulisya ang suspek na si Eduardo Taghoy, Jr., 40 anyos, hinihinalang ‘high’ sa ilegal na droga, nang pagbabarilin ang mga nagdaraan sa kalsada.

Nang kapanayamin sa estasyon ng pulis, sinabi ng suspek na mayroong demonyong bumulong sa kaniya para magpaputok ng baril.

Ayon kay P/Lt. Col. Christian Torres, tagapagasalita ng Lapu-Lapu CPO, agad binawian ng buhay ang isang retratista, isang kolektor ng utang, at isang kinilalang Ngangang Aying.

Samantala, dinala sa pagamutan ang isang 30-anyos construction worker dahil sa tama ng bala ng baril sa kaniyang katawan.

Matapos magpaulan ng bala, umuwi ang suspek sa kaniyang bahay kung saan siya nadakip sa ikinasang operasyon ng pulisya.

Nakompiska mula sa suspek ang ilang pakete ng hinihinalang shabu, at isang kalibre .45 baril.

Nabatid na nauna nang naaresto ang suspek dahil sa kasong may kaugnayan sa ilegal na droga at kalalaya pa lamang mula sa piitan, nitong nakalipas na apat na buwan.