HATAW! D'yaryo ng Bayan hatawtabloid.com
INIUTOS ni Mayor Maria Sheilah “Honey” Lacuna – Pangan ang pagbabago sa housing policy na ipinatutupad ng Manila government na ang awardees ay magiging pag-aari ang units na kanilang hinuhulugan sa pamamagitan ng rent-to-own system, hindi gaya noong nakaraang administrasyon na kailangan mong maghulog nang habang-buhay, pero hindi mapapasaiyo ang unit.
Sa kanyang mensahe sa inagurasyon ng Pedro Gil Residences, inianunsyo ni Lacuna na hiniling na niya sa Manila City Council sa pamumuno ni Vice Mayor Yul Servo at kay Manila Urban Settlements Office (MUSO) head Atty. Dave de Guzman na lumikha ng bagong sistema para sa housing units ng lungsod.
Sa ilalim ng dating administrasyon ni Mayor Isko Moreno, ang awardees ay pawang ‘assignees’ na walang katapusang magbabayad buwan-buwan nang walang posibilidad na magiging kanila ang unit pagdating nang araw.
Mga kawani ng Manila City Hall ang mga unang benepisaryo ng kauna-unahang rent-to-own public low-cost condo units na ang mga awardee ay napili sa pamamagitan ng public raffle.
Nabatid na ang buwanang upa ay nasa pagitan ng P2,000 hanggang P3,000 kada buwan at pagkatapos ng itinakdang bilang ng taon ng pagbabayad ng unit, ia-award na sa kanila ang titulo ng condo unit.
“Kung dati ay habang-buhay kayong magbabayad ng renta, simula ngayon, ang inyong buwan-buwang hinuhulugan, hindi na po pawang renta lang habang buhay. Ito po ay magiging pabahay na rent-to-own,” diin ng alkalde.
Sinabi ni City Engineer Moises Alcantara na ang 20-storey condo building ay may 299 residential units, 143 parking slots, five commercial spaces, five elevator units, swimming pool, fitness room, function room, roof deck, at parehong may indoor at outdoor activity areas.
Kasabay nito, binuksan din sa publiko ang super health center sa nasabing gusali kasama si Congressman Irwin Tieng na nangako na tutulong sa pagbibigay ng mga kailangang medical equipment.
Pinasalamatan ni Lacuna si Tieng sa kanyang all-out support at sinabing walang imposible kung ang national government at local government ay magkasama at nagtutulungan.
Ang nasabing public health center ay kompleto at mayroong libreng serbisyo tulad ng laboratory, ECG, ultrasound, at portable x-ray, at iba pa. Mayroong silid para sa dental care at minor surgeries.
“Bilang isang doktor, prayoridad natin ang pangangalaga sa kalusugan ng ating mga kababayan. Ninais nating ayusin, palakasin at pag-ibayuhin ang mga serbisyo ng ating health centers, kabilang na nga itong Pedro Gil Health Center. Mas marami na itong serbisyong maibibigay sa atin tulad ng basic laboratory services, ECG, at ultrasound sa mga buntis. Dito na makukuha ang maintenance medicines ng mga lolo at lola natin,” saad ni Lacuna.
Idinagdag na: “Maibibigay ng Pedro Gil Health Center ang epektibo at episyenteng pagpapatupad ng universal health care. Tiniyak natin na mayroong license-to-operate at ang disenyo ay naaayon sa pamantayan ng Department of Health para sa primary health care provider facility.” (BONG SON)
