HATAW! D'yaryo ng Bayan hatawtabloid.com
WALA nang buhay nang matagpuan ang isang 32-anyos babaeng pinaghihinalaang ‘scammer’ sa Hacienda Lizares, Brgy. Matab-ang, lungsod ng Talisay, lalawigan ng Negros Occidental, nitong Linggo ng umaga, 12 Enero.
Kinilala ni P/Maj. Rhazl Jim Jocson, deputy chief ng Talisay CPS, ang biktimang si Carl Kimberlyn Degabi, 32 anyos, residente sa Brgy. Mandalagan, sa nabanggit na lungsod.
Ayon kay P/Maj. Jocson, umalis ng kanilang bahay si Degabi nitong Sabado ng gabi, 11 Enero.
Aniya, maaaring pinatay ang biktima sa ibang lugar bago itinapon sa Brgy. Matab-ang.
Hinihintay ng pulisya ang resulta ng awtopsiya sa katawan ni Degabi upang matukoy ang sanhi ng kaniyang pagkamatay at kung siya ay ginahasa.
Natagpuan si Degabi na may mga sugat sa kaniyang bibig.
Nagsasagawa ng imbestigasyon ang mga awtoridad kung pinaslang ang biktima dahil sa pera dahil sa mga post sa social media na pinararatangan siyang scammer.
