Sa Payatas, QC
P.7-M SHABU NASABAT ‘LADY PUSHER’ TIMBOG

ARESTADO ang 19-anyos babae sa isinagawang buybust operation ng mga awtoridad sa Brgy. Payatas A, Quezon City, nitong Martes ng madaling araw, 17 Disyembre.

Ayon kay P/Lt. Col. Rolando Baula, Station Commander ng QCPD Station 13, nakipagtransaksiyon ang poseur buyer sa suspek para sa P1,500 halaga ng ilegal na droga.

Naging hudyat ang palitan ng pera at ilegal na droga upang dakpin ng mga awtoridad ang suspek.

Ayon sa pulisya, mga residente sa lugar ang nagsumbong sa nangyayaring bentahan ng ilegal na droga.

Ani P/Lt. Col. Baula, naka-concentrate ang suspek sa Brgy. Payatas dahil pawang tagaroon lamang ang kaniyang mga kliyente.

Nakompiska mula sa suspek ang 110 gramo ng hinihinalang shabu na tinatayang nagkakahalaga ng P748,000.

Samantala, pinasinungalingan ng suspek na nagbebenta siya ng ilegal na droga at sinabing ang tumakas na asawa niya ang pusher.

Kasalukuyan nang nakakulong ang suspek sa QCPD Station 3 at mahaharap sa reklamong paglabag sa RA 9165 o Comprehensive Dangerous Drugs Act of 2002.