Sylvia binigyang importansya mga artista sa Topakk inilagay lahat sa  poster 

MATABIL
ni John Fontanilla

HINDI raw halos makatayo sa kanilang kinauupuan ang mga artistang kasama sa pelikulang Topakk habang nanonood ng kanilang pelikula cast screening na hatid ni Sylvia Sanchez ng Nathan Studios sa sobrang ganda.

At dahil nga sa sobrang ganda ng pelikula at sa husay ng mga artistang kasama ‘di na rin nila nagawang umihi dahil kaabang-abang ang bawat tagpo.

Kaya naman tiyak isa ang Topakk sa talaga namang aabangang pelikula sa 50th Metro Manila Film Festival at malaki ang tsansang maging Best Picture.

Ang hardcore action/drama film na Topakk ay pinagbibidahan nina Arjo Atayde at Julia Montes kasama sina Kokoy de Santos, Michael Roy Jornales, Vin Abrenica, Paolo Paraiso, Enchong Dee at marami pang iba

Hatid ng Nathan Studios,  idinirehe ni Richard Somes at mapapanood sa Dec. 25 (Christmas Day).

Unang ipinalabas ang Topakk sa 78th Cannes Film Festival noong May 2023 at nag-premiere naman sa 76th Locarno Film Festival sa Switzerland noong August 2023.

Kuwento ni Ms Sylvia, lahat ng artistang kasama sa movie maliit man ang role ay inilagay niya sa poster ang pangalan, bilang pasasalamat na rin sa ambag ng mga ito para mas mapaganda pa ang pelikula.