John humanga sa sobrang makapamilya ni April Boy

RATED R
ni Rommel Gonzales

UNANG lead role ni John Arcenas ang pagganap bilang yumaong music legend na si April Boy Regino sa IDOL: The April Boy Regino Story.

Ano ang mga natutunan ni John tungkol sa pamilya ni April Boy at sa buhay nito?

“Ako po bilang April Boy, natutunan ko na napaka…talagang nandoon ‘yung pagmamahal ni April Boy kay Madeline…

“Siyempre unang-una sa Diyos, kay Madeline at sa mga anak niya, kasi biruin ninyo siya ‘yung unang ano niya, naging kasintahan niya, tapos hanggang huli, hanggang dulo siya lang, first and last siya.

“So ayun din, ganoon din ‘yung pagmamahal bilang tatay sa mga anak niya, ipinakita niya na lahat ibibigay niya para sa mga anak niya.

“At siyempre noong kahit nagkaroon siya ng challenges, ipinakita pa rin niya ‘yung pagmamahal niya sa Diyos, na ipinakita na wala siya kung wala ang Diyos.

“Kaya nagkaroon siya ng challenges, medyo tumalikod siya sa Diyos, nagtampo siya sa Diyos pero sa dulo bumalik siya at nanaig ‘yung pananampalataya niya sa Diyos.”

Ipalalabas sa mga sinehan sa Nobyembre 27 ang pelikula na mula sa Premiere WaterPlus Productions at Executive Producer na si Marynette Gamboa.

Sa direksyon ng character actor na si Efren Reyes, Jr., nasa pelikula rin si Kate Yalung bilang si Madelyn Regino na misis ng yumaong singer.