Magsasaka itinumba sa harap ng mag-ina

BUMULAGTA ang isang magsasaka matapos barilin ng hindi kilalang mga suspek sa harap ng kaniyang mag-ina sa Sitio Huwebesan, Brgy. Marcelo, sa bayan ng Calatrava, lalawigan ng Negros Occidental, nitong Miyerkoles ng umaga, 16 Oktubre.

Ayon sa ulat na natanggap ni P/Maj. Wilfredo Benoman, Jr., hepe ng Calatrava MPS, naglalakad ang biktimang kinilalang si Danny Brazona, 54 anyos, kasama ang kinakasama at kanilang 7-anyos anak na lalaki upang ihatid sa paaralan nang harangin sila ng mga armadong lalaki saka siya pinagbabaril at mabilis na nagsitakas.

Agad namatay si Brazona dahil sa mga tama ng bala ng baril sa kaniyang katawan habang nakaligtas ang kaniyang mag-ina.

Patuloy ang imbestigasyon ng pulisya upang matukoy ang pagkakakilanlan ng mga suspek at ang motibo sa likod ng krimen.