Judy Ann sa pagtanggap ng Espantaho — overwhelm ako sa cast at nae-excite

RATED R
ni Rommel Gonzales

HANDS-ON bilang ina si Judy Ann Santos at nakatutok sa lahat ng ganap ng kanilang tatlong anak ni Ryan Agoncillo na sina Yohan, Lucho, at Luna.

Kaya naman kapag may pelikula o seryeng ginagawa ay umiikot ang work schedule niya sa schedule ng mga anak.

Ipinaaalam niya agad sa produksiyon kung ano ang mga petsa na hindi siya puwedeng mag-shoot o mag-taping.

“Kaya simula pa lang nilalatag ko na,” saad ni Juday.

“And I am very grateful na naintindihan naman iyon ni Atty. Joji at ni direk Chito.”

Ang producer na si Atty Joji Alonso ng Quantum Films ang tinutukoy ni Juday na producer ng bago niyang pelikula, ang Espantaho, at ang direktor nilang si Chito Roño.

“Noong una kaming nagkita parang hindi pa rin ako makapaniwala na, ‘Okay, totoo na ito, nangyayari na ito.’

“Siyempre sa bawat first shooting day naman puro light scenes pa lang, naroon pa ‘yung warming up with the cast.”

Kasama ni Juday sa Espantaho ang multi-awarded actress na si Lorna Tolentino at ang mga beteranang aktres na sina Chanda Romero at Janice de Belen.

Nasa cast din ng pelikula sina JC Santos, Donna Cariaga, Nico Antonio, Kian Co, Mon Confiado, Tommy Abuel, at Eugene Domingo.

 “So noong nakita ko na ‘yung buong cast, magkakasama na kami, nao-overwhelm na ako.

“‘Yung nae-excite na ako, nakikita ko na, nakikita ko na ‘yung eksena, hindi pa namin isinu-shoot nakikita ko na kung anong mangyayari.

“Na ang likot din ng utak ni direk Chito rito sa pelikulang ito. ‘Yung magugulat ka biglang iba na ‘yung gagawin mo sa nabasa mo sa script.

“So it’s more of parang impromptu? Not the acting but ‘yung storyline niya.

“Parang biglang may gulatan kaya nakaaaliw din, nakae-excite kung ano ‘yung magiging end product namin,” excited na pahayag pa ni Judy Ann.