QC resto kinulimbat, customers hinoldap

PINASOK at hinoldap ng apat na holdaper ang isang restaurant  sa Quezon City at tinangay ang mga cellphone at pera ng mga kostumer nitong Sabado ng gabi. 

Kinilala ang mga biktima na sina Rynelie Royo, 32, may-ari ng ChikTen Wings Restaurant; Mayraquel Montano, cashier;  Charles Mathew Cerez, 21; Riccie  Aduana, 21;   Margie Gabito, 29; pawang kitchen staff, at ang mga kostumer na sina  Dionisio Gabito, Francine Abanto, at Criel Osorio.

               Sa report ng Project 6 Police Station (PS 15) ng Quezon City Police Disrict (QCPD), bandang 10:39 pm nitong Sabado, 24 Agosto, nang maganap ang insidente sa loob ng ChikTen Wings Restaurant na matatagpuan sa No. 19 Congressional Ave., Brgy. Bahay Toro, Quezon City.

Batay sa imbestigasyon ni P/Cpl. Rigor Resonable, abala ang mga staff ng nasabing restaurant sa pag-asiste sa kanilang mga kostumer nang biglang pumasok ang dalawa sa apat na suspek na armado ng mga baril na nagdeklara ng holdap.

Agad nilimas ng mga suspek ang P60,700 halaga ng mga cellphone, at P10,000 cash ng mga biktima at kostumer, Samsung Tablet na nagkakahalaga ng P10,000, maging ang  cashier box na naglalaman ng P22,000.

Agad na sumakay ang mga suspek sa Honda Click at Honda PCX kung saan naghihintay ang dalawa pa nilang kasamahan na nagsilbing lookout.

Patuloy ang isinasagawang imbestigasyon ng pulisya sa naganap na insidente. (ALMAR DANGUILAN)