Carlos at inang Angelica dapat magkapatawaran

MA at PA
ni Rommel Placente

NGAYONG nakauwi na ng  Pilipinas ang 2-time Olympic gold medalist na si Carlos Yulo, inaabangan na ng lahat kung ano na ang magiging hakbang niya para magkaayos na sila ng kanyang ina na si Angelica Yulo.

Naniniwala ang kanyang mga tagasuporta na mas magiging kompleto ang kanyang tagumpay kung tuluyan na silang magkakaayos ng ina. 

May mga nag-suggest na sana’y siya na ang magpakumbaba sa kanyang ina para maging maayos na ang kanilang relasyon at huwag nang pagpiyestahan ng mga intrigera’t intrigero ang pamilya nila.

Komento ng iba sa social media, walang mawawala kay Caloy kung siya na ang unang lalapit at makikipagbati kay Angelica, at siguradong mas magiging maligaya pa siya kapag nangyari ito.

Pero may ilang netizens naman ang nagsabi na kung talagang nais maayos ni Angelica ang pamilya, bilang ina ay siya na ang unang lumapit sa anak at tapusin na ang alitang namamagitan sa kanilang mag-ina.