Susan at Empoy kakaiba ang chemistry

RATED R
ni Rommel Gonzales

ISANG bagong kabanata para sa longest-running historical, traditional, at cultural show ng GMA Public Affairs na I Juander ang masasaksihan dahil ipakikilala na ang bagong co-host si Susan Enriquez, ang komedyante at “Pambansang Leading Man” na si Empoy Marquez.

Good vibes at mga bagong kaalaman ang naghihintay sa mga ka-Juander dahil sabay tutuklasin nina Susan at Empoy ang mayamang pagkakakilanlan ng mga Filipino sa masaya ngunit nakatututong paraan.

Pagbabahagi ng pinakabagong Ka-Juander, surprise at excitement ang nadama niya nang bigyan siya ng pagkakataong maging bahagi ng programa.

“Sobrang overwhelmed ako, I was surprised at ako’y kinuha ng ‘I Juander’ bilang kasama at kapartner ni Mama Su. Sobrang happy ako na kasama na ninyo sa programa at looking forward ako sa iba pa naming gagawin,” ani Empoy.

Siniguro naman ni Susan sa viewers na mas marami pa silang matututunan at mas magiging masaya ang kanilang Sunday night, lalo na kasama na niya si Empoy bilang co-host.

“Magaan katrabaho si Empoy dahil siya ay isang komedyante, so I hope it will be more fun working with him sa mga darating pang episode ng ‘I Juander.’ I hope magkakaroon kami ng magandang chemistry ni Empoy. We’ll make sure na sa panonood ninyo ng ‘I Juander,’ matututo na kayo, at the same time, magiging magaan ang inyong Linggo ng gabi bago matulog dahil kayo’y napasaya namin sa mga episode na i-o-offer ng programa kasama si Empoy,” pagbabahagi pa ni Susan.

Sa kanilang unang episode together, masayang ipasisilip nina Susan at Empoy and kultura at tradisyon ng kanilang sariling hometown.

Magtutungo si Empoy sa kanyang probinsiya sa Bulacan para tuklasin at tikman ang ilan sa mga ipinagmamalaking local delicacies. Samantala, lilibutin naman ni Susan ang Cavite para itampok ang ilan sa mga kakaiba at masasarap na putahe ng siyudad.

Magkakaroon din ng labanan ang Bulaceño at Caviteña dahil sasalang ang dalawang hosts sa exciting challenges na maglalabas ng kanilang husay sa pagluluto.

Makisaya sa makulay na paglalakbay nina Susan at Empoy tuwing Linggo, 8:00 p.m. sa GTV.