HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
BINIGYAN ng Restricted-16 (R-16) ng Movie and Television Review and Classification Board (MTRCB) ang Deadpool/Wolverine na nagtatampok kina Ryan Reynolds at Hugh Jackman. Ang R-16 ay para lamang sa mga edad 16 pataas.
Ito’y sa dahilang may mga eksenang hindi akma sa mga manonood na edad 15 pababa, tulad ng matitinding karahasan, madudugong eksena at ilang mga mapaminsalang imahen. Ito ayon na rin sa pagtaya ng MTRCB Board Members Bobby Andrews, Jose Alberto V, at Johnny Revilla.
Binigyang diin ng MTRCB na bagamat may komedya ang pelikula, posibleng nakababahala sa mga batang manonood ang ilang maseselang eksena.
Binigyan din ng R-16 rating ang All My Friends Are Dead ng Pioneer Film nina MTRCB Board Members Andrews, Almira Muhlach, at JoAnn Bañaga. Anila, ang sekswal na nilalaman ng pelikula, katatakutan na hindi angkop sa mga bata at mga eksena ng karahasan ang dahilan ng R-16 rating.
Binigyan din R-16 rating ang pelikula ng Pinoyflix Films at Entertainment Production, Inc., na pinagbibidahan nina Alexa Ocampo, Jeffrey Santos, Rash Flores, at Lara Morena.
Anang Board Members na sina Bañaga, Andrews, at Eloisa Matias, hindi angkop sa mga edad 15 at pababa ang ilang mararahas at madudugong eksena, paggamit ng armas, droga at pagpapakita ng malubhang pisikal na pananakit.
Pinaalalahanan naman ni MTRCB Chairperson and CEO Lala Sotto-Antonio ang mga magulang na ang R-16 classification ay maaaring may mga maseselang pananaw sa tema, eksena, lengguwahe, karahasan, sekswal, horror, at droga na hindi angkop sa edad 15 pababa.
