HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
HALATANG walang malisyang nabitawan ni Willie Revillame ang ukol sa sinasabi ng netizens na pagbuking nito sa relasyong Coco Martin at Julia Montes gayundin sa umano’y mga anak nito.
Noong Linggo, sa debut ng programa ni Willie na Wil to Win sa TV5 na ginanap sa New Frontier Theater, pinasalamatan nito si Coco na bumati sa kanya sa pagkakaroon ng bagong programa sa pamamagitan ng video greet. Isa si Coco sa mga nagbigay ng video greet kay Willie.
Magkaibigan sina Willie at Coco na naging bisita nito noong Abril, Holyweek sa resort niya. Kasamang bumisita roon ni Coco sina John Estrada at Cherry Pie Picache.
Kaya hindi kataka-taka na isa si Coco sa nagbigay ng video greet kay Willie. At bilang pasasalamat, nasabi ni Willie na, “Thank you very much Tanggol! Thank you Coco sa pagbati mo. I like your bangs ha,” pag-joke ni Willie.
“Sobrang bait itong si Coco Martin. Coco, to Julia, at sa mga mga anak niyo, pamilya mo, salamat Coco,” sabi pa ni Willie na tila hindi pansin na may naibuking siya.
“Noong time ng Holy Week magkasama tayo at sana dumating ‘yung time, igi-guest mo ako sa ‘Batang Quiapo.’ Bibigyan na kita ng jacket!” dagdag pa ni Willie.
Bagamat nababalita ang ukol sa relasyon nina Coco at Julia, walang pag-amin pa ang dalawa.
