HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
GWAPO, malakas ang dating at pwedeng-pwedeng maging matinee idol. Siya si Itan Rosales, ang bagong alaga ni Len Carillo ng 3:16 Media Network. Bukod sa pag-arte kasama rin siya sa grupong VMX V na kinabibilangan din nina Karl Aquino, Marco Gomez, Calvin Reyes, at ang bagong miyembro nitong si Dio de Jesus.
Taong 2022 pinasok ni Itan ang showbiz subalit ngayon lamang siya nabibigyan ng pagkakataon na maipakita ang talento sa pag-arte.
Ayon kay Len, matagal nang gustong mag-artista ni Itan at unang mapapanood ang talento nito sa pag-arte sa pamamagitan ng pelikulang Hiraya sa Vivamax na idinirehe ni Sidney Pascua at ipinrodyus ng 3:16 Media Network .
Kasama rin siya sa Uhaw katambal sina Angeli Khang at Princess Ataska na idinirehe naman ni Bobby Bonifacio Jr. gayundin sa Kaskasero na ang leading ladies niya’y sina Christine Bermas at Angela Morena na idinirehe ni Ludwig Peralta. Isinulat ito nina Quinn Carillo at Sidney Pascua, handog ng 3:16 Media Network.
At ngayong Vivamax aktor na si Itan natanong ito kung gaano siya katapang sa pagpapakita ng kaseksihan at katawan at kung may limitasyon ba siya?
Anang binata, hindi lahat ay ipinakita niya sa mga daring na eksena. At kung may nakikita man sa kanya, sumusunod lamang siya sa kung anong ibigay sa kanya. Pero may limitasyon siya sa sarili.
Naitanong din namin sa kanya kung mas gusto ba niyang mas malinya siya bilang dramatic actor at ang sagot nito, “Okey din po sa akin. Ang sa akin naman po kung ano ang ibigay sa akin, gagawin ko hanggang kaya ko.”
Sinabi pa ni Itan na hindi pa rin niya kayang ipakita lahat-lahat sa mga daring na eksena. “Unti-unti muna para may kasabikan ang manonood,” birong sabi nito nang makausap namin sa Viva Cafe pagkatapos ng show ng kanilang grupo, ang VMX V.
Sa kabilang banda, natanong din si Itan sa kung sinong young actress ang gusto niyang makatrabaho at nasabi nitong si Andrea Brillantes.
Hindi nito itinagong crush niya ang Kapamilya actress kaya gusto rin niyang makilala ito.
