HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
KATUWA naman iyong naisipang gimmick ng Viva Films, Studio Viva, at Viva Foods. Aba naman, nabusog ka na, makakapanood ka pa ng magandang pelikula. Ang tinutukoy namin ay ang pagsasanib-puwersa ng pelikulang Kuman Thong na pinagbibidahan Cindy Miranda, Althea Ruedas, Emman Esquivel na isinulat at idinirehe ni Xian Lim at ng Botejyu at Wingzone.
Sa bawat P2,000 purchase sa Botejyu may 2 (dalawang) libreng cinema tickets na kayo. At sa bawat P900 purchase naman sa Wingzone may 1 (isang) libreng tiket ka rin! Kailangan lamang kumain sa alinmang sangay ng Botejyu at Wingzone para makakuha ng libreng tiket. Ang promo ay nagsimula noong June 20 at magtatagal hanggang July 9, 2024. Kaya go na, kumain at mag-chill sa pamamagitan ng Kuman Thong.
Ang speaking of Kuman Thong, ito ay isang horror film na may direct translation na “golden young boy.” Palabas na ito sa mga sinehan simula July 3. Ito ay hango sa Thai occult tradition na ang isang piguring may espiritu ng bata ay maaaring magdala ng suwerte kapag binigyan ng tamang paggalang at kapahamakan kung hindi ito maaalagaan.
Ang kuwento ay tungkol kay Clara (Cindy), na pupunta sa Thailand kasama ang anak na si Katie (Althea) para humingi ng basbas kay Namfon (Jariya Therakaosal), ang ina ng kanyang mapapangasawa na si Sai Chon (Max Diloknawarit). Hindi masaya si Namfon na lilipat na ang kanyang nag-iisang anak na lalaki sa Pilipinas. Naniniwala siyang hindi pa handa ang dalawa, lalo at nagluluksa pa si Clara sa pagkamatay ng kanyang anak na si Isaac (Emman). Palagi pang dala ni Clara ang urn na naglalaman ng abo ni Isaac.
Sa kanyang pagbisita sa Thailand, makikilala ni Clara ang isang shaman na may isasagawang ritwal gamit ang abo ni Isaac. Bibigyan din siya nito ng isang Kuman Thong. Ayon sa shaman, kung aalagaan niyang mabuti ang Kuman Thong, maaaring magbalik si Isaac.
Sa kabila ng pagtutol ni Namfon, itatago pa rin ni Clara ang Kuman Thong sa pag-asang muling makakapiling ang anak.
Pagkatapos magsimulang mag-alay ni Clara sa Kuman Thong, mababalot ang kanilang dati’y tahimik na tahanan ng mga kakaibang pangyayari. Nag-uumpisa na ring magbago ang kilos ni Clara, at nararamdaman na rin niya ang presensya ni Isaac. Kahit nalalagay na sa panganib ang kanilang pamilya, masaya pa rin sina Clara at Katie sa “pagbabalik” ni Isaac.
Lalong mag-iiba ang kanilang buhay dahil tila hindi lamang ang espiritu ni Isaac ang nagbabanta sa kanilang pamilya, na hahantong sa pagkabunyag ng mga malagim na sikreto na babago sa kanilang buhay.
Ang Kuman Thong, na kinunan sa Thailand, ay isinulat ni Xian. Nakuha niya ang inspirasyon sa Thai mythology. “My goal is to do justice to the Thai mythology and capture its authenticity,” aniya sa isang interview.
Ito ang unang full-length horror film ni Xian bilang direktor, pero hindi ito ang unang pagsabak niya sa isang papel sa likod ng kamera. Ang kanyang directorial debut ay ang thriller na Tabon na bahagi ng Cinemalaya Film Festival 2019. Noong January 2023 naman napanood sa mga sinehan ang kanyang comedy movie na Hello, Universe! starring Janno Gibbs at Benjie Paras.
Ibinahagi naman ng Thai actor na si Max, na leading man ng pelikula, ang kanyang galak na makatrabaho ang beauty queen-turned-actress na si Cindy para sa kanyang unang Filipino movie project. Kilala si Max sa kanyang Thai projects na Manner of Death at Bangkok Love Stories: Innocence, habang si Cindy ay napanood sa Martyr or Murderer at Reroute.
Maghanda na sa isang nakakikilabot na movie experience na tiyak na magpapakapit sa ’yo sa inyong kinauupuan. Saksihan ang kapangyarihan ng Kuman Thong sa mga sinehan, palabas na sa buong bansa simula July 3.
