Kelvin at Kira emosyonal sa unang pagtatambal

SHOWBIZ KONEK
ni Maricris Valdez Nicasio

NANGINGINIG at naiiyak si Kira Balinger sa red carpet premiere night ng pelikula nilang pinagbibidahan din ni Kelvin Miranda, ang Chances Are, You and I handog ng Pocket Media Productions at Happy Infinite Productions na ginanap sa SM Cinema Megamall, Martes ng gabi.

Hindi kasi makapaniwala si Kira na bukod sa napakaraming tao ang nanood sinuportahan pa rin siya ng kanyang pamilya, fans, at executive ng ABS-CBN. 

Masaya rin si Kira na finally ay maipalalabas na ang pelikula nilang ukol sa dalawang Gen Z na kapwa may sakit sa utak at biktima ng aksidente. 

“We’ve waited so long for this moment and it was finally happening. We’re so happy to share our beautiful movie with you. Family mom and dad, friends to all of my fans, maraming-maraming salamat sa inyo na you’re here despite the traffic,” panimula ni Kira bago inumpisahan ang pagpapalabas ng pelikula. “My star magic family, direk Loren (Dyogi), Inang (Olive Lamasan) and sa mga Kapuso fans ni Kelvin, ‘hello, ako po si Kira.

“My only wish for tonight is that we will make everybody proud and I hope you will enjoy our movie, maraming-maraming salamat po,” sabi pa ni Kira.

Hirap din si Kelvin kung paano magpapasalamat sa mga taong dumagsa sa cinema. “Hindi ko po alam kung ano ang sasabihin ko kahit na po ang daming nangyari, kontrobersiya na na-experience, na-encounter namin dito sa pelikulang ito, totoo po iyon para sa inyo ang pelikulang ito. Ginawa namin ang lahat ng makakaya namin para maitaguyod, mapaganda nang husto.

“Gusto ko pong i-acknolweledge ang aking pamilya, GMA family, Kapamilya, Kapatid, fans, family, friends, maraming-maraming salamat sa inyong lahat. Sabay-sabay po tayong matuto ngayong gabi sa pelikulang ito. Para sa inyong lahat ito. Salamat.”

Bago ito’y kitang-kita na ang pagiging emosyonal ni Kira habang naglalakad  kasama sina Kelvin at direk Catherine Camarillo sa red carpet dahil talaga namang dinumog sila na halos hindi na makadaan patungo sa cinema.

Bukod sa mga nabanggit namin sa itaas sinuportahan din sina Kira at Kelvin nina Iza Calzado, Amy Austria, Jane de Leo, Angel Guardian, Teejar Marquez, Kaila Estrada, Roselle Monteverde ng Regal Films, at marami pang iba.

Kahanga-hanga ang akting na ipinakita ni Kira na sa umpisa pa lang ay nai-establish na ang role bilang si Gabriel Sinag. Masayahing bata bagamat may iniinda na bukod sa may sakit ay maagang naiwan ng mga magulang. Mahal din ng screen si Kira na bukod sa ganda, epektibong aktres.

Si Kelvin si Sol na may pagkamasungit ang karakter. Pero ang laging pagtatagpo nila ni Kira bilang sina Sol at Gab ay epektibo at kitang-kita ang chemistry. 

Showing na ang Chances Are, You and I sa mga sinehan.