Kelot todas sa tandem

PATAY ang isang binata matapos pagbabarilin ng isa sa dalawang hindi kilalang suspek habang inaayos ang pagpaparada ng kanyang motorsiklo sa Malabon City.

Nairejord sa CCTV camera ang ginawang pamamaril ng suspek sa biktimang si alyas Julius Kulot, 21 anyos, residente sa Bagong Barrio, Caloocan City na namatay kaagad sanhi ng mga tama ng bala sa ulo at katawan.

Sa tinanggap na ulat ni Malabon City police chief P/Col. Jay Baybayan, naganap ang insidente dakong 1:15 pm nitong Sabado sa harap ng Araneta De La Salle University (dating GAUF) sa Brgy. Potrero habang inaayos ng biktima ang pagpaparada ng kanyang motorsiklo sa harapan ng naturang pamantasan.

Sa pahayag sa pulisya ng saksing si alyas Rolly, 39 anyos, vendor ng mani sa lugar, nakita niya ang pagdating ng dalawang lalaking magkaangkas sa motorsiklo na parehong nakasuot ng itim na jacket at huminto sa tabi ng biktima.

Bumaba ang nakaangkas na armado ng baril at malapitang pinaputukan nang tatlong beses ang biktima bago mabilis na nagsitakas patungo sa direksiyon ng Bagong Barrio.

Patuloy na iniimbestigahan ng pulisya ang motibo ng pamamaril para sa posibleng pagkakakilanlan at ikadarakip ng mga suspek. (ROMMEL SALES)