HATAW! D'yaryo ng Bayan hatawtabloid.com
INARESTO ang sinabing isang miyembro ng criminal gang matapos inguso sa mga pulis na may dalang baril habang gumagala sa Malabon City, kamakalawa ng hapon.
Kinilala ni Malabon City police chief P/Col. Jay Baybayan ang naarestong suspek na si alyas Kulot, 50 anyos, na mahaharap sa kasong paglabag sa RA 10591 o Comprehensive Firearms and Ammunation Regulation Act.
Sa kanyang ulat kay NPD Director P/BGen. Rizalito Gapas, sinabi ni Col. Baybayan na nakatanggap ng impormasyon mula sa isang impormante ang mga operatiba ng Station Intelligence Section (SIS) hinggil sa isang lalaki na armado ng baril habang gumagala sa Liwayway St., Brgy. Bayan-Bayanan.
Kaagad nagtungo sa naturang lugar ang mga pulis at doon naaktohan ang suspek na may bitbit na baril kaya agad nilang nilapitan saka inaresto dakong 5:50 pm.
Nakopiska ng mga pulis sa suspek ang isang caliber .22 revolver, kargado ng tatlong bala at walang kaukulang mga papel hinggil sa legalidad nito. (ROMMEL SALES)
