Alden ayaw nang kalkalin relasyon kay Kathryn

HATAWAN
ni Ed de Leon

NGAYON tuwiran nang sinasabi ni Alden Richards na kung ano man ang namamagitan sa kanila ni Kathryn Bernardo ay gusto niyang manatiling pribado lamang. Eh kasi bakit mo nga naman hahayaang kalkalin ang mga personal mong buhay. Hindi bale iyong love team nila noon ni Maine Mendoza dahil love team lang naman iyon at hindi totoo kaya natural kung ano man iyon labas sa tv agad. 

Tingnan nga ninyo ang nangyari may ginawa lamang silang eksena ng kasal na talaga namang para sa Kalye Serye lang ng Eat Bulaga pinaniwalaan naman ng iba na talagang ikinasal nga sila at may dalawang anak.

Isipin ninyo may nag-isip pa ngang kasuhan si Maine dahil bakit daw nagpakasal iyon kay Congressman Arjo Atayde eh may asawa na iyon at dalawang anak kay Alden.

Ngayon dahil mukhang totohanan na nga yata, ayaw na ni Alden ng magulo at may nakikialam pa. Tama naman iyon, kung gusto nilang tahimik ang buhay nila, huwag nilang hayaang may makialam sa kanila tutal iyong ligawan naman yata nila sa ngayon ay totohanan at hindi para sa isang pelikula lamang.