Bakuna vs Polio sa Navotas, umabot na sa 101%

NAKAPAGBAKUNA na ang Navotas ng aabot sa 101 porsiyento ng target na populasyon nito para sa Chikiting Ligtas 2024 — ang nationwide bivalent Oral Polio Vaccine Supplemental Immunization Activity (bOPV-SIA) na pinangunahan ng Department of Health (DOH).

Ang Navotas ang kauna-unahan sa mga lungsod sa CAMANAVA ang nakaabot sa target nito na nakapagtala ang City Health Office ng kabuuang 16,062 bata na nabakunahan laban sa polio sa lungsod.

Sa bilang na ito, 661 bata ang 0-23 buwang gulang, habang 15,401 ay 24-59 buwang gulang. Ang mga batang ito ay naka-target para sa pagbabakuna pagkatapos mawalan ng ilang dosis o hindi makatanggap ng kahit anong dosis sa nakaraang taon.

Hinikayat ni Mayor John Rey Tiangco ang mga magulang at tagapag-alaga na pabakunahan ang kanilang mga anak laban sa poliovirus, na isang potensiyal na nakapanghihinang sakit na nakaaapekto sa spinal cord at mga kalamnan. Ito ay lalong mapanganib para sa mga batang 5-anyos pababa.

“The polio vaccine is safe and effective. Let us ensure that our children are protected from vaccine-preventable diseases by making sure that their immunization is updated,” ani Tiangco.

Sa kasalukuyan ay wala pang alam na gamot para sa polio at ang pagbabakuna ay ang tanging epektibong paraan upang maiwasan ang posibilidad ng isang outbreak.

Ang kampanyang Chikiting Ligtas ay magpapatuloy hanggang 15 Mayo 2024. Ang regular na pagbabakuna ay patuloy na makukuha sa mga health centers sa lungsod. (ROMMEL SALES)