HATAW! D'yaryo ng Bayan hatawtabloid.com
NON-STOP talaga ang mga pasabog ng action-packed series na Black Rider dahil magkakasama na ang kasangga ng masa at ang pinakabatang neurosurgeon sa Pilipinas.
Sa trailer na ipinalabas, magku-krus ang landas nina Elias (Ruru Madrid) at ni Doc Analyn (Jillian Ward) ng Abot-Kamay na Pangarap. Marami ang curious kung ano nga ba ang magiging papel ng doktora sa buhay ng bida lalo’t sa trailer ay parehong duguan sina Elias at Doc Analyn sa isang eksena.
Dahil sa crossover ng dalawang hit Kapuso series, talaga namang lalong na-excite ang viewers sa mga susunod na mangyayari sa serye. Komento ng isa, “Dami talagang medical mission ni Doc Analyn! Gusto ko na tuloy panoorin ang eksenang kasama siya.”
Hirit naman ng isang viewer, “Nako, hindi pwedeng mamatay si Doc sa Black Rider kundi katapusan na rin ng kanyang mga pangarap.”
Bukod kay Doc Analyn, tutok din ang viewers sa pagdating ni Nimfa, ang karakter na ginagampanan ni Angeli Khang. Sey ng iba, mukhang magiging balakid siya sa love story nina Elias at Bane (Yassi Pressman).
