HATAW! D'yaryo ng Bayan hatawtabloid.com
HINIMOK ng isang kongresista ang Kagawaran ng Agrikultura (DA) na tulungan ang bansa sa pagpapababa ng malawakang kaso ng diabetes sa pamamagitan ng pagtatanim ng palay na mababa ang nilalamang asukal at mataas ang protina.
Ayon kay AGRI Party-list Rep. Wilbert T. Lee maaaring makipagtulungan ang DA sa International Rice Research Institute (IRRI) upang maipamahagi, sa lalong madaling panahon, ang palay na “ultra-low glycemic index (GI) and protein-rich variety of rice to Filipino farmers.”
Ayon kay Lee, makatutulong ito sa pagbaba ng mga kaso ng diabetes sa bansa.
“Hindi naman po kaila sa atin na ang Filipinas ay isa sa mga nangungunang consumer ng bigas sa buong mundo. At dahil tila permanenteng parte na ng ating pagkain ang kanin, hindi maikakaila ang koneksiyon nito sa rami ng may diabetes sa bansa,” ani Lee.
Base sa pinakabagong datos mula sa International Diabetes Federation noong 2021 ang matandang populasyon ng bansa ay 66,754,400 at mayroong 4,303,899 ang may diabetes. Aniya katumbas ito ng 6.44 porsiyento ng populasyon.
Ayon sa kongresista, noong nakaraang taon, 2023, umabot sa 14,416 ang namatay dahil sa diabetes. Pang-apat ang diabetes sa mga kaso ng pagkamatay sa bansa.
Ani Lee, binabalak ng IRRI na isulong ang “ultra-low GI, high protein rice variety” sa susunod na taon (2025).
Ayon sa IRRI, ipinamahagi na ito sa sampung probinsiya.
Umaasa ang IRRI na darami ang magtatanim nito pagkatapos matukoy ang maaaring mercado nito. Anila, ang presyo ng ganitong klaseng bigas ay pareho lamang sa kasalukuyang bigas sa merkado.
“Kapag napabilis natin ang pag-distribute ng variety ng bigas na ito sa ating mga magsasaka, mas mapapabilis din ang pagme-mainstream nito sa mercado,” ani Lee.
“Kapag mas may access at nagawa pa nating mas abot-kaya sa Filipino ang ganitong klase ng bigas, mas marami ang matutulungan nating makaiwas o mabawasan ang alalahanin sa mga chronic disease tulad ng diabetes at mga komplikasyon nito sa kalusugan,” aniya.
“Dahil sinasabi rin ng mga eksperto na mas mabilis tayong makakaramdam ng pagkabusog sa bigas na ito, mas kaunti rin ang ikokonsumo natin. Bawas na sa pangamba sa sakit, bawas pa sa gastos. ‘Winner Tayo Lahat’ sa bagong uri at mas healthy na bigas na ito,” anang kongresista. (GERRY BALDO)
