HATAW! D'yaryo ng Bayan hatawtabloid.com
PATAY ang isang taxi driver matapos pagbabarilin ng dalawang hindi kilalang mga suspek na sakay ng isang motorsiklo sa Malabon City, kahapon ng umaga.
Dead on the spot ang biktimang kinilalang si alyas Ricky, 44 anyos, taxi driver, sanhi ng mga tama ng bala ng baril sa katawan.
Sa inisyal na imbestigasyon nina P/SSgt. Jeric Tindugan at P/SSgt. Allan Bermejo, sakay ang biktima sa kanyang minamanehong taxi habang binabagtas ang kahabaan ng Waling-Waling Road, Brgy. Potrero.
Pagsapit sa kanto ng Industry Road sa nasabing barangay dakong 10:40 am ay dinikitan ng mga suspek na magkaangkas sa isang itim na motorsiklo at dalawang beses na pinaputukan ang taxi na nagresulta sa kamatayan ng biktima.
Matapos ang pamamaril, mabilis na tumakas ang mga suspek sa hindi matukoy na direksiyon habang agad nagsagawa ng follow-up operation ang mga tauhan ng Malabon police ngunit nabigo silang maaresto ang mga suspect.
Ayon kay Malabon City Police OIC Col. Jay Baybayan, posibleng may kinalaman sa droga ang nangyaring pamamaslang matapos makuha sa loob ng minamanehong taxi ng biktima ang ilang drug paraphernalia at isang weighing scale na ginagamit na panukat sa pagbebenta ng shabu.
Natuklasan ng pulisya sa isinagawang background investigation sa biktima na nakasuhan na siya noong taong 2017 at 2020 sa San Mateo, Rizal na may kinalaman sa ilegal na droga.
Sinusuri na ng pulisya ang kuha ng mga nakakabit na CCTV camera sa lugar na posibleng makatulong upang matukoy ang pagkakakilanlan ng mga suspect.
(ROMMEL SALES)
