‘Astang Rambo’ dinakma sa Malabon

BINITBIT ng pulisya sa selda ang isang lalaking ‘astang Rambo’ na palakad-lakad habang armado ng isang shotgun na kargado ng mga bala sa Malabon City.

Sa imbestigasyon ng Malabon police, nakatanggap ng sumbong mula sa mga residente sa Pilapil St., Brgy. Catmon ang mga tauhan ng Sub-Station 4 hinggil sa isang lalaki na mistulang nasa ‘war zone’ kung umasta sa bitbit niyang shotgun.

Kaagad silang nagresponde sa nasabing lugar kung saan natiyempohan nina P/SSgt. Bernardino Bernal at P/Cpl. Rochester Bocyag ang suspek, kinilalang si alyas Rodel na palakad-lakad habang may bitbit na baril.

Bago pa makaporma, kaagad dinamba ng mga pulis ang suspek hanggang makompiska ang isang

12-gauge shotgun na may tatak na “Squibman” at kargado ng dalawang bala.

Nabigo ang suspek na si Rodel na magpakita ng dokumento na magpapatunay na legal ang pagmamay-ari at pagdadala niya ng mataas na uri ng armas kaya isinelda siya ng mga awtoridad. (ROMMEL SALES)