DonBelle pinagkaguluhan nang bumili ng bibe hair clip sa Binondo

MA at PA
ni Rommel Placente

VIRAL ang video nina Donny Pangilinan at Belle Mariano na namimili ng usong-uso ngayong bibe hair clip sa Binondo. Sa nasabing lugar kasi sila nagti-taping ng top-rating series na Can’t Buy Me Love. 

Habang break time nila sa kanilang taping, ay sinamantala nila na mag-ikot-ikot sa Binondo. At dito nga ay bumili sila ng bibe hair clip. Hindi rin talaga sila pahuhuli sa uso, huh.

Makikita sa video na si Belle ang pinapili ni Donny sa mga itinitindang bibe hair clip sa Binondo na kanilang isusuot. 

Sa pag-iikot ng DonBelle sa Binondo, dahil mga sikat, pinagkaguluhan sila ng mga tao. Game na game naman ang dalawa na nagpa-picture sa mga ito. Kaya tuwang-tuwa sa kanila ang netizens.

Siyempre pa, kilig na kilig naman ang mga tagahanga ng DonBelle sa viral video nila. Sabi ng mga fan, kaya nakiuso sina Donny at Belle sa bibe hair clip ay dahil bibe, as in baby nila ang isa’t isa.

Well, sana nga ay talagang baby nina Donny at Belle ang isa’t isa at hindi sila hanggang loveteam lang, para mas lalo silang mahalin ng kanilang mga tagahanga. Ang mga fan kasi, ang gusto nila sa loveteam ay loveteam din sa totoong buhay, ‘di ba?

Gaya ko, tagahanga ako ng loveteam noon nina Maricel Soriano at William Martinez. Kilig na kilig talaga ako sa kanila. At winish ko na sila ang magkatuluyan. Kaso nga, hindi ‘yun nangyari. Kaya na-sad ako nang mauwi rin sa wala ang  kanilang relasyon. Hanggang loveteam lang talaga sila noon.