HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
MASAYA at nagpapasalamat si Sen. Bong Revilla sa napakagandang resulta ng kanilang pilot episode ng weekly action-comedy series sa GMA, ang Walang Matigas na Pulis sa Matinik na Misis Season 2.
Kaya naman tiniyak ng magiting na senador na bawat episode ay talaga namang tiyak ikatutuwa ng mga sumusubaybay sa kanila linggo-linggo na bawat episodes ay may mga pasabog.
Anang senador, gusto niyang tutukan ang action-comedy series para matiyak na de kalidad ang maihahatid nila sa mga televiewers bukod pa sa nagpaplano siyang gumawa ng pelikula.
“Nagpapasalamat ako sa GMA sa all-out support nila. At ipinakita naman talaga, na sa Episode 1 ng Season 2, talagang punompuno ng action. Akala mo usually inilalagay na ‘yung malaking eksena sa first part ng episode, ‘no? But dito sa atin, towards the end ‘yung laki ng eksena. Kaya dapat panoorin niyo.”
At dahil hitik sa action, nasabi ni Sen. Bong na hindi siya pang-TV, pampelikula.
Samantala, bukod sa naihayag na niya noon na planong pelikula kasama si Jillian Ward at ang reunion project nila ni Sharon Cuneta, ikinakasa na rin ang maituturing na malaking proyekto na pagsasamahan nila nina Coco Martin, Sen. Robin Padilla, at Sen. Lito Lapid.
“Pinag-uusapan pa lang namin. Basta hintayin na lang natin. Mahirap namang pangunahan natin agad, baka ma-preempt,” katwiran ni Sen. Bong nang kulitin ng mga dumalong entertainment press sa isang mediacon kung pang Metro Manila Film Festival 2024 ba ito?
Basta tiniyak ng senador na magiging worth it ang mapapanood at paghihintay sa maituturing na malaking proyekto nilang apat.
Sa kabilang banda, isang dinner with family ang magaganap ngayong Valentine’s Day sa kanilang pamilya.
Sa pag-uurirat kay Sen. Bong ukol sa plano nila ng butihing maybahay niyang si Cong. Lani Mercado, nasabi nga nitong magsasama-sama ng kanilang pamilya para sa isang dinner kaya excited na sila lalo ang kanyang asawang si Lani.
“Mayroon nang inihahanda ang aking maybahay, si Lani, with the whole family, doon kami. ‘Yung mga kapatid ko, ‘yung mga anak ko, mga asawa-asawa nila, sama-sama kami sa bahay lang. Mag-iihaw-ihaw kami roon,” anang aktor.
