HATAW! D'yaryo ng Bayan hatawtabloid.com
ALAM MO NA!
ni Nonie Nicasio
NAGMARKA si Massimo Scofield sa mundo ng showbiz bilang isang Vivamax sexy actor. Ang hunk at guwapitong talent ni Jojo Veloso ay palaban sa mga daring na eksena sa Vivamax.
Pero sa ngayon ay hindi sa showbiz ang focus ng aktor, kundi sa mga alaga niyang manok na panabong.
Aminadong bata pa lang ay nakahiligan na ni Massiomo ang pag-aalaga ng manok. “Grade school pa lang po ako ay mahilig na talaga ako sa manok. Lahat ng alagang manok ng tatay ko pinapakialaman ko at pinagsasabong ko kahit hindi po talaga sila yung manok na pang-sabong.
“Natutuwa po ako kapag nakakakita ako ng manok na naglalaban, eh.”
Nilinaw ng aktor na hindi niya iiwan ang showbiz. “Wala naman po akong balak mag-quit sa showbiz,” madiin na deklara niya.
So, palaban pa rin siya sa pagpapa-sexy sa Vivamax?
Esplika ni Massimo, “Palaban pa rin naman po, naghihintay lang ng project na pasok sa schedule ko, medyo hectic din po kasi ang schedule ng isang sabungero. Hahaha!”
Dagdag pa niya, “Medyo naging busy lang po ako ngayon sa mga seminars. Inaaral ko pa po kasing mabuti yung mundo ng sabong para po matutunan ko lahat ng angulo sa pagmamanok.
“Dahil po rito, nakakakuwentuhan ko rin po ang mga malalaking personalidad gaya po ng ating legendary breeder na si sir Joe Alimbuyuguen na walang sawa kung magbigay ng advice, hindi lang sa pagmamanok, kundi sa pagiging matapat at pagiging mabuting ehemplo sa mga baguhan sa industry, na tulad ko.”
Kung gagawa ng pelikula ukol sa sabong ang Vivamax, game ba siyang maging bahagi ng cast ito?
“Napakagandang concept po niyan. Sa rami nating mga sabungero sa Pilipinas, sigurado ako na marami ang mag-aabang niyan,” nakangiting sambit ng aktor.
Ang huling pelikulang nagawa ni Massimo ay ang A Glimpse of Forever ni Direk JP Laxamana. Pero hindi pa raw alam ng aktor kung kailan at saan ito ipalalabas.
