Irespeto nila ang proseso! — sigaw ng abogado ng TAPE Inc.

I-FLEX
ni Jun Nardo

IPINAUBAYA na ng TAPE, Inc. ang theme song ng Eat Bulaga dahil may bago na ring  host ang show nilang Eat Bulaga at may sarili na rin itong theme song.

Kahit may desisyon na ang adjudicator ng Bureau of Legal Affairs ng Intellectual Property Office sa pagpabor ng trademark registration kay Joey de Leon, wala naman sa desisyon ng adjudicator na ipinagbabawal sa TAPE na gamitin ang Eat Bulaga ayon sa legal counsel nilang si Atty. Maggie Garduque.

“Makikita naman ninyo sa decision ‘yon. It’s nowhere to be found. At wala ring temporary restraining order na gamitin ito.

“Marami pang mangyayaring apela  kaugnay nito. Basta kung titingnan ninyo ang website ng IPO, nakalagay doon na registered sa TAPE ang Eat Bulaga habang ‘yung kay Joey eh may nakalagay na pending,” pahayag ni Atty. Maggie.

Irerespeto ng TAPE ang desisyon ng adjudicator ng IPO, sabi ni Atty. Maggie, “Irespeto nila ang proseso!”

So huwag nang magtaka kung sa dalawang noontime shows eh gamit ang title na Eat Bulaga dahil hindi pa tapos ang bakbakan ng dalawang kampo, huh!