HATAW! D'yaryo ng Bayan hatawtabloid.com
PATAY ang isang binatilyo nang makipagsaksakan sa 21-anyos binata sa isang birthday party sa Navotas City, kamakalawa ng gabi.
Dead on arrival sa Navotas City Hospital (NCH) ang biktimang menor de edad sanhi ng mga tama ng saksak sa katawan habang nadakip ng mga tauhan ni Navotas police chief P/Col. Mario Cortes ang suspek na isang alyas Jerome, residente sa Leongson St., Brgy. San Roque nang matunton sa pinagdalhang ospital ng kaanak dahil may saksak sa kanang bahagi ng katawan malapit sa kili-kili.
Sa ulat ni Col. Cortes kay Northern Police District (NPD) Director P/BGen. Rizalito Gapas, nagtungo sa isang birthday party ang dalawang nagsaksakan dakong 9:00 pm sa Tulay Uno, Daang Hari St., Brgy. Daang Hari upang makisaya pero biglang narinig ang kanilang mainitang pagtatalo.
Sa gitna ng pagtatalo, bumunot ng patalim ang suspek at inundayan ng sunod-sunod na saksak ang binatilyo pero naglabas din ng patalim ang huli saka gumanti ng saksak sa ‘kaaway.’
Matapos ito, isinugod ang biktima sa nasabing ospital, ngunit idineklarang dead on arrival, habang natunton ng mga tauhan ng Navotas Police Sub-Station 2, sa pangunguna ni P/EMSgt. Guiama Ibrahim ang suspek sa Tondo Medical Center (TMC) dakong 12:10 am kung saan siya inaresto. (ROMMEL SALES )
