HATAW! D'yaryo ng Bayan hatawtabloid.com
MULING kinilala ng Department of Health (DOH), sa pamamagitan ng Health Facilities and Services Regulatory Bureau, ang Navotas City Hospital (NCH) bilang isa sa Top 15 Level 1 na ospital sa bansa.
Ang pagkilala ay ibinigay sa NCH para sa pagtataguyod ng de-kalidad na pangangalagang pangkalusugan habang patuloy na naghahanap ng pagbabago sa paghahatid ng pangangalaga sa pasyente.
Si Dr. Spica Acoba, NCH Medical Director, at Dr. Roan Salafranca, Chief of Clinics, ay tumanggap ng parangal sa seremonya ng 2023 DOH Hospital Star Awards na ginanap sa Iloilo City.
“We will continue to draw inspiration from this milestone to meet the challenges and further provide excellent medical and health facilities to our constituents,” ani Mayor John Rey Tiangco.
Ngayong taon, pinasinayaan ng Navotas ang mga karagdagang pasilidad sa kalusugan, kabilang ang isang bagong laboratoryo sa Navotas City Hospital at isang molecular laboratory sa Brgy. NBBS Dagat-dagatan.
Naghahanda na rin para sa pagtatayo ng isang super health center sa Brgy. NBBS Kaunlaran.
“We are grateful to our hospital and healthcare workers for their unwavering commitment and compassion in caring for the health and wellness of Navoteños,” dagdag ni Tiangco.
Ang mga nagwagi sa DOH Hospital Star Awards ay pinili sa pamamagitan ng masusing pagsusuri ng kanilang mga programa, aktibidad, inisyatiba, at inobasyon sa mga sumusunod na pamantayan: kaligtasan at pagkontrol sa impeksiyon, pagbibigay ng serbisyo, kasiyahan ng customer at empleyado, mga aktibidad na nakabatay sa komunidad, pagpapabuti ng kalidad, kasama ang pagharap COVID-19 pandemic. (ROMMEL SALES)
