3 tulak huli sa Malabon at Navotas

TATLONG tulak ng ilegal na droga ang inaresto sa magkakahiwalay na buybust operations ng pulisya sa mga lungsod ng Malabon at Navotas.

               Sa ulat ni Navotas City police chief, Col. Mario Cortes kay Northern Police District (NPD) Director P/BGen. Rizalito Gapas, dakong 3:23 am nang magsagawa ang mga operatiba ng Station Drug Enforcement Unit (SDEU) sa pangunguna ni P/Cpt. Genere Sanchez ng buybust operation sa Judge Roldan St., Brgy. San Roque nang makatanggap ng ulat hinggil sa illegal drug activities ni Patrick Rubio, alyas Tupa, 31 anyos, residente sa B. Cruz St., Brgy. Tangos North.

Kaagad dinamba ng mga operatiba si Rubio matapos magbenta ng P500 halaga ng shabu ang isang pulis na nagpanggap na buyer sa Judge Roldan St., Brgy. NBBS, Dagat-Dagatan.

               Ani P/SSgt. Ramir Ramirez, nakompiska sa suspek ang 10.3 gramo ng hinihinalang shabu na may standard drug price value na P70,040 at isang P500 bill na ginamit bilang buybust money.

Sa Malabon, natimbog ng mga operatiba ng SDEU ng Malabon police sa ilalim ng pangangasiwa ni P/Lt. Jonas Gato sina Christian De Leon, 22 anyos, residente sa Brgy. Tañong, at Orlando Sito, alyas Buko, 49 anyos, isang fish vendor, residente sa Brgy. 8, Caloocan City, sa buybust operation sa C4 Road, Brgy. Tañong, 11:45 pm.

               Ayon kay P/SSgt. Kenneth Geronimo, nakuha sa mga suspek ang nasa 2.8 gramo ng hinihinalang shabu na nagkakahalaga ng P19,040 at P500 marked money.

               Mahaharap ang mga suspek sa kasong paglabag sa RA 9165 o Comprehensive Dangerous Drug Act of 2002. (ROMMEL SALES)