P.1-M shabu huli sa 2 tulak ng bato

ARESTADO ang dalawang tulak ng ilegal na droga, kabilang ang high value individual (HVI) matapos makuhaan ng mahigit P.1 milyong halaga ng shabu sa isinagawang buybust operation ng pulisya sa Caloocan City, kahapon ng madaling araw.

Kinilala ni Caloocan City police chief P/Col. Ruben Lacuesta ang naarestong mga suspek na sina alyas Kalbo, 41 anyos, isang HVI, residente sa Brgy. 8; at isang alyas Bet, 42 anyos, ng Brgy. 73, kapwa ng nasabing lungsod.

Sa kanyang report kay Northern Police District (NPD) Director P/BGen. Rizalito Gapas, sinabi ni Col. Lacuesta, dakong 5:30 am nang magsagawa ang mga operatiba ng Station Drug Enforcement Unit (SDEU) sa pangunguna ni P/Capt. Emmanuel Aldana ng buybust operation nang matanggap ang impormasyon hinggil sa illegal drug activities ni alyas Kalbo.

Kaagad sinunggaban ng mga operatiba ang mga suspek matapos magsabwatan para bentahan ng halagang P8,500 shabu ang isang pulis na nagpanggap na buyer sa Julian Felipe St., Brgy. 8.

Nakompiska sa mga suspek ang halos 20 gramo ng hinihinalang shabu, may standard drug price value na P136,000, at buybust money na isang tunay na P500 bill at walong pirasong P1,000 boodle money.

Nakatakdang isailalim ang mga suspek sa inquest proceedings sa Caloocan City Prosecutor’s Office kaugnay ng kakaharapin nilang kasong paglabag sa Sections 5 at 11 of Article II of R.A. 9165 (Comprehensive Dangerous Drug Act of 2002). (ROMMEL SALES)