John Lloyd ipinangalandakan relasyon kay Isabel

MA at PA
ni Rommel Placente

INAMIN na ni John Lloyd Cruz sa Fast Talk With Boy Abunda ang relasyon niya kay Isabel Santos, apo ng award-winning cartoonist at fine arts painter na si Mauro Santos. 

Sabi ni John Lloyd na natatawa, “Si Isabel ay girlfriend ko. Boyfriend niya ako. We’re boring people. Wala kaming maikukuwento. Ganyan lang kami.

“Matagal na kaming magkakilala. Gallery nila ‘yung una kong ipinasok na gallery.

“At the time na bago pa lang akong tumigil with ABS-CBN, napadpad ako sa pag-e-explore ng arts so, gallery nila ‘yung una kong napasok.

“Sila ‘yung mga una kong nakilala. ‘Yung family nila, kung sino ‘yung patrons ng gallery nila. Matagal na kaming magkakilala.

“We were talking before but hindi nag-evolve into something ideal for us, at the time. Mula noon, present na rin siya sa buhay ko,” aniya pa.

Sa tanong ni Kuya Boy kay John Lloyd kung nakatulong si Isabel sa paniniwala niya sa kasal, ang sagot ng aktor.“Yeah! Malaki ‘yung… she’s very elemental sa mga ganyang bagay.

“Sa kung paano namo-mold ‘yung kung anuman ‘yung mga lumalabas sa bibig ko. Kung anuman ‘yung nabubuo sa isip ko.

“Siyempre, ‘yung consideration lagi for the two of us, especially para sa kanya, laging nandoon,” ani Lloydie. 

“Nagtatanong about showbiz si Isabel?” sumunod na tanong ni Kuya Boy.

“Hindi masyado,” sagot ni John Lloyd.

“Siguro when it comes to films, lumalabas ‘yon. But ‘yung siya, like tatanungin kung paano, hindi masyado.”