HATAW! D'yaryo ng Bayan hatawtabloid.com
“‘WAG kayong lalapit, mamalasin kayo!” habang iwinawasiwas ang hawak na patalim.
Ito umano ang pagbabanta ng isang lasing na call center agent matapos pagbantaan ang mga pulis na nagresponde sa ginagawa niyang pagwawala at paghahamon ng away habang armado ng patalim sa Malabon City, kamakalawa ng gabi.
Sa kulungan na nahimasmasan ang suspek na kinilalang si Davidson Joseph Demdam, 32 anyos, residente sa Gil Pascual St., Brgy. Hulong Duhat ng nasabing lungsod.
Batay sa ulat ni Malabon City police chief P/Col. Jay Baybayan kay Northern Police District (NPD) Director P/BGen. Rizalito Gapas, dakong 6:45 pm, habang nagsasagawa ng regular na pagpapatrolya kaugnay sa ipinaiiral na police visibility ang mga tauhan ng Police Sub-Station 5 sa C-4 Road nang mapuna nila ang nagaganap na komosyon sa C-4 Park, Brgy. Longos.
Kaagad itong tinungo ng mga pulis ang parke at dito nila inabutan ang binatang call center agent habang nagsisisigaw at hinahamon ng away ang lahat ng mga taong namamasyal sa lugar.
Nilapitan ng mga unipormadong pulis ang suspek at pilit na pinapayapa ngunit imbes sumuko, binantaan pa ang mga awtoridad.
Ilang minutong pinakiusapan ng mga pulis ang call center agent hanggang makakita ng pagkakataon sina P/Cpl. Michael Allanic at Pat. Angelito Subrio na dambahin ang suspek at nagawang kunin sa kanya ang hawak na patalim.
Ayon kay Col. Baybayan, kasong Alarm and Scandal at ilegal na pagdadala ng patalim ang isasampa ni P/SSgt. Jeric Tindugan, may hawak ng kaso, laban sa suspek sa piskalya ng Malabon. (ROMMEL SALES)
