HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
WOMAN empowerment ang hatid na mensahe ng bagong handog na pelikula ng Vivamax at pinagbibidahan ni Angela Morena, ang Ahasss na idinirehe ni Ato Bautista at palabas na simula October 13.
Hindi kataka-takang gandang-ganda si Angela sa pelikula dahil aniya, “Hindi mo alam kung sino ang ahas na tinutukoy sa title. Sa ending doon mo lang malalaman na lahat pala sila ay ahas.
“Ang ganda rin niyong arc ng character ko kasi from being an obedient wife throughout the film, she turns into an assertive woman who realizes she has to love herself more than any other man in her life.”
Ang Ahasss ang magiging mainit, mapusok, at marahas na pinakabagong sexy thriller nina Angela Morena, Janelle Tee, at Gold Aceron.
Itoy ukol sa isang binata na mahuhulog at maaakit sa ganda ng isang babae na tutulungang makalaya mula sa pagmamalupit ng asawa.
Kahit may pagkakataong mabait, nagiging abusado at sadista si Mr. Stonehill kay Adelyne tuwing nakakainom. Tinatawag niya ang asawa kapag may inuman kasama ng mga tauhan at kaibigan tulad ni Agusto (Jao Mapa), isang pulis na nagtratrabaho bilang bodyguard at security ni Mr. Stonehill. Pilit na pinasasayaw at ipinakikita ang ganda ng katawan ni Adelyne, at kapag hindi siya sumunod ay aabusuhin at mamaltratuhin siya.
Isang gabi na naulit ang ganitong insidente ay nilapitan ni Jake si Adelyne para tulungan at alagaan. Dito magsisimulang magkalapit ang dalawa at magkaroon ng mga patago at mapusok na pagkikita.
Pagpaplanuhan nina Adelyne at Jake na patayin si Mr. Stonehill, pero sa paggawa nila nito, hindi nila maiisip kung gaano kalaki, katibay, at kalakas na pader si Mr. Stonehill para na lang basta patumbahin.
Ang Ahasss ay mula kay Ato Bautista, isang award-winning director na kilala sa paggawa ng mga dark thriller at drama na mga kuwento. Ang mga pelikula niyang Carnivore noong 2008 at ‘Di Natatapos Ang Gabi (The Night Infinite) noong 2010 ay ang mga nagpanalo sa kanya ng Best Director at Lino Brocka Award sa Cinemanila International Film Festival.
Ito rin ang comeback ng The Other Wife star na si Janelle Tee sa Vivamax. Gagampanan niya ang isang mahalagang role na maaaring makabuti o makasira sa pagmamahalan nina Jake at Adelyne.
