Stell naka-usap, nakilala ng personal ang BTS

RATED R
ni Rommel Gonzales

REBELASYON ang ikinuwento ni Stell ng SB19 na nakilala na niya ng personal noon ang grupong BTS.

Nangyari ang pasabog ni Stell sa latest guesting niya sa Fast Talk With Boy Abunda na inihayag niya ang unang pagkikita nila ng BTS na pinakasikat na Korean boy group sa buong mundo.

“‘Yung experience na ‘yun Tito Boy, sobrang fresh pa rin sa utak ko eh. Kasi noong time na ‘yun starting pa sila na group and ‘yung era po nila na ‘yun is parang ‘Danger’ pa.

“So ‘yung song po nila na ‘Danger’ iyon po ‘yung ipino-promote nila.”

Taong 2014 iyon na baguhan pa lamang ang BTS samantalng hindi pa nabubuo ang SB19.

Magkasama noon sina Stell at SB19 co-member na si Josh sa isang Filipino dance cover group, ang Se-Eon.

“We were very lucky na kami ‘yung Filipino cover group na ipinadala ng Philippines that time to compete with other countries,” patuloy na kuwento ni Stell. “Super thankful din kami na pumayag ‘yung management nila na ma-meet namin sila backstage.

“For them, happy rin sila na ma-meet kami kasi sabi nila kami raw po ‘yung first Filipino cover group na na-meet nila.

“So we were very happy and lucky to have that interaction with them that time so super happy and blessed po kami. 

“Hanggang ngayon sariwa pa po sa isip ko ‘yung nangyari that time,” sabi pa ni Stell.

Nabuo ang SB19, kasama sina Pablo, Ken, at Justin noong October 2018.

At tulad ng BTS, sikat na sikat na rin ngayon ang SB19 hindi lamang sa Pilipinas kundi maging sa abroad.

Sa katunayan, masasabing si Stell ang pinaka-paboritong coach sa The Voice Generations na napapanood tuwing Linggo, 7:00 p.m. sa GMA.

Hosted by Dingdong Dantes, coach din dito sina Billy Crawford, Chito Miranda, at Julie Anne San Jose.