Kasalang Arjo at Maine ‘di na dapat pagtalunan kung totoo o hindi

HATAWAN
ni Ed de Leon

TALAGA bang fake ang kasal nina Maine Mendoza at Arjo Atayde kagaya ng sinasabi at gustong paniwalaan ng Aldub Nation?

Kung kami ang tatanungin, naniniwala kaming legal na kasal sina Arjo at Maine. Una, nakakuha sila ng marriage license na hindi mangyayari kung may valid mariage ang isa sa kanila. Mahirap namang ma-fake iyan dahil computerised na iyang marriage license pa lang, at kung may duda pa sa kanino man sa kanila, tiyak na pakukunin sila ng CENOMAR ng civil registrar bago bigyan ng lisensiya.

Ang main element ng kasal ay ang pakikipagksundo ng babae at lalaki na sila ay magsasama bilang mag-asawa. Ang nagkasal sa kanila ay totoong pari, at kahit na sabihin mong hindi iyon nagpaalam sa obispo ng Baguio na isinagawa ang kasal, hindi iyon sapat na dahilan para ipawalang bisa ang kasal. Ang gagawin ng pari ay ipapasok ang record sa kanyang parokya at irerehistro sa Civil Registrar ng kanyang lugar. Ang isang pari na itinalaga ng kanyang obispo ay maaaring magkasal saan man, at hindi pinag-uusapan kung saan ba siya nagkasal. Kailangan lamang na kahit na ang isa sa mga ikinasal ay miyembro ng kanyang relihiyon. Hindi maaaring ikasal ng isang pari o isang ministro ang dalawang hindi parehonn miyembro ng kanyang relihiyon.

Ang simbahan din naman ay naglalabas ng marriage bans, isang buwan bago ang kasal para nga kung ang isa sa mga ikakasal ay hindi dapat na makasal, maaaring maghain ng pagtutol ang sino man. Sa ritual din ng kasal, nagkakaroon muna ng pagtatanong ang pari kung may tutol sa kasal na iyon, at kung mayroon, pakikinggan muna siya ng pari kung may sapat na dahilan ang kanyang pagtutol.

So far wala namang nangyaring ganyan. Lumabas ang Aldub Nation na iginigiit na ikinasal na sila Alden at Maine noon pa at may tatlong anak, pero wala naman silang dokumentong inilalabas. Maging si Alden ay nagsasabing hindi totoo iyon. Sabihin man ninyong may anak si Maine, kung hindi naman siya kasal sa tatay niyon, legal ang kasal niya kay Arjo.

Wala na tayong pagtatalunan, mag-asawa na nga sina Maine at Arjo.