Munti LGU ginawaran ng ARISE

NANGUNA ang Muntinlupa local government unit (LGU) sa pitong iba pang lungsod sa mga recipient ng Accelerating Reforms for Improved Service Efficiency (ARISE) Awards bunsod ng pagpapabuti ng mga serbisyo ng pamahalaan.

Tumanggap ng pagkilala ang pamahalaang lungsod ng Muntinlupa mula sa Anti-Red Tape Authority (ARTA) dahil sa innovative business registration.

Ayon kay Muntinlupa City Mayor Ruffy Biazon, patunay ang nasabing pagkilala ng commitment ng lungsod na maghatid ng serbisyo publiko sa mga Muntinlupeño.

Ang Business One-Stop Shop (BOSS) ng lungsod at ang electronic format nito na eBOSS ay naglalagay sa mga ahensiya sa iisang lokasyon para sa aplikasyon ng permits at business licenses.

Naglunsad din ang lungsod ng Business Permits and Licensing Office Single-Window Transaction (BPLO-SWiT) Program na layong mapalapit ang pagbabayad ng buwis at registration services sa mga negosyante.

Maaari rin mag-renew ang mga business owner ng kanilang permit sa Muntinlupa City Hall, at sa pamamagitan ng online gamit ang kanilang Business E-payment System na makikita sa website ng lungsod. (GINA GARCIA)