Quinn Carrillo, agree ba na ang VMX Bellas ang bagong Sex Bomb?

ALAM MO NA!
ni Nonie Nicasio

KABILANG si Quinn Carrillo sa bagong all girl group na VMX Bellas na ang apat pang members ay sina Hershie de Leon, Denise Esteban, Angelica Cervantes, at Tiffany Grey.

Sa ipinakita nilang mahusay na performance kamakailan sa Viva Cafe, tiyak na hahataw pa lalo ang limang talended na hottie na ito.

Sa aming panayam kay Quinn recently, inusisa namin siya kung paano niya ide-describe ang VMX Bellas.

Saad niya, “Ngayon po kasi mas fierce and sexy yung branding namin, unlike noong time namin as Belladonnas. siyempre over the years mga nag-mature na rin po kami and since galing naman po kami sa Vivamax na mga nag-sexy, kaya po mas on brand siya ngayon as fierce and sexy.”

Aminado si Quinn na na-miss niya ang mag-perform tulad ng panahong aktibo pa ang kanilang grupo na Belladonnas.

“Opo, sobra! Na-miss ko po talaga ang mag-perform. Iba po kasi siya from acting… iba yung energy na nakukuha mo from the crowd, eh.

“Tsaka para sa akin po kasi, mas free ka pag performing, kasi mas ikaw iyong inilalabas mo at ine-enjoy mo lang yung music, ganoon,” sambit pa ng mahusay na actress/writer.

Parang nabuhay ba ulit ang Belladonnas?

“Hindi naman po sa nabuhay ulit. Siguro partly, since yung ibang members noon, kasama pa rin po now. Siyempre iba na po iyong ngayon, sa time namin as Belladonnas noon.”

May kaibahan ba ang VMX Bellas sa Belladonnas?

“Mayroon po. Back then when we were Belladonnas, siyempre po mga bagets pa, mga pa-cute, ganyan. Ngayon po need na ipakita na nag-mature na kami as individuals.”

How about sa ibang all girl group, ano ang masasabi niyang kaibahan ngVMX Bellas?

“Hindi ko po masabi kung anong kaibahan, eh. Kasi po lahat naman po kapag gumagawa ng all girl group may branding na po iyan sila na ina-achieve.

“So, ang masasabi ko lang po is, kami stick kami sa branding namin.”

Ano ang reaction niya, ang VMX Bellas daw ang bagong Sex Bomb?

“Nako! Hindi po yata ako maniniwala na kami ang bagong Sex Bomb,” paiwas na reaksiyon ni Quinn.

Esplika pa niya, “Wala naman po yatang makakapantay sa naachieve ng Sex Bomb. Basta po kami gagawin lang po namin ang best namin at e-enjoyin ang pagpe-perform. Bonus na lang po ang mga papuri ng tao.”

Posible bang magkaroon sila ng digital single?

“Wala pa po ako idea kung magkakaron eh. Basta po thankful na po kami na nabigyan kami ng ganitong opportunity ng Viva,” nakangiting pahayag pa ni Quinn.

Anyway, si Quinn ay mapapanood din sa pelikulang Litrato na tinatampukan nila ni Ai Ai delas Alas.

Gumaganap si Quinn dito bilang si Angel, isang istriktang caregiver na mapapalapit ang loob sa isang lolang may Alzheimer’s disease na gagampanan naman ng Comedy Queen na si Ai Ai delas Alas.

Wala pa po ako idea kung magkakaron eh. Basta po thankful na po kami na nabigyan kami ng ganitong opportunity ng viva.

Ang Litrato ay mula sa panulat ni Direk Ralston Jover at sa pamamahala ni Direk Louie Ignacio. Tampok din dito sina Ara Mina, Bodjie Pascua, Duane David, Rowan Diaz, at Liza Lorena.

Ito ay hatid ng 3:16 Media Network ni Ms. Len Carrillo.