Sweet mas feel magdirehe — baguhan pa lang kasi ako

RATED R
ni Rommel Gonzales

MAS nakapokus ngayon si John ‘Sweet’ Lapus sa pagdidirehe, ang latest na proyekto niya ay ang Jack And Jill Sa Diamond Hills nina Jake Cuenca at Sue Ramirez.

Kilala ring artista bilang komedyante si Sweet sa pelikula at telebisyon, kaya tinanong namin siya, kung sakaling may offer na sabay darating sa kanya, ang isa ay bilang artista at ang isa ay bilang direktor, ano ang tatanggapin niya?

“Oh my God, sabay io-offer?

“Oh, oh my God! Anyway, artista pa rin po pala ako so… hindi naman po araw-araw ang taping nitong ‘Jack and Jill,’ puwede pa po akong mag-guest.

“Pakisabi niyo po sa mga producer. Star Magic pa rin po ang management ko, pareho po kami ni Jake ng handler at manager, si Allan Real po, kami pong tatlo Star Magic po kami,” sabay-turo sa mga katabi niya during the mediacon na sina Jake at Sue.

“Tawag po kayo, puwede pa po ako,” ang birong-totoong panawagan ni Sweet.

“Oh my gosh, siguro kung sabay? Siguro ang magiging dahilan ng pagpili ko is the material.

“You have to understand ang tagal ko nang artista, almost 30 years na akong artista, so kung nagawa ko na ‘yung role na ‘yun medyo mas doon ako sa… mas pipiliin ko ‘yung magdirehe na most likely dahil nga baguhan pa lang akong direktor hindi ko pa nagawa kung ano man ‘yung ididireheng iyon.

“To think na mas mataas ang talent fee ko as an artista kompara as a director, pero to answer your question mas pipiliin ko ‘yung  hindi ko pa nagawa.”

Ang Jack and Jill Sa Diamond Hills ay mula sa TV5, APT Entertainment, at Cignal TV at napapanood sa Kapatid Network, Linggo, 6:00 p.m..