Liza Dino itinanggi pagwaldas sa pera ng FDCP, pagdiskaril sa pagkakatalaga kay Pip

HATAWAN
ni Ed de Leon

HINDI lang ang sinasabing walang habas niyang pagwawaldas ng pera ng bayan noong siya pa ang Chairman ng Film Development Council of the Philippines (FDCP) ang pinasinungalingan ni Liza Dino kundi pati ang bintang ng ilang insiders mismo ahensiya na tinangka rin niyang idiskaril pati ang take over ni Tirso Cruz III kahit na naitalaga na iyon ni Presidente BBM. 

Nang sabihin daw kay Liza ng isang empleado ng FDCP na dumating na angappointment ni Pip, sinigawan umano ang empleado, inutusang isarang muli ang envelope na naglalaman ng appointment at sinabihang huwag sasabihan o tatawagan si Pip na naroroon na ang kanyang appointment.

Inakusahan pa raw niya ang empleado ng insubordination. May nagsasabing baka kaya ganoon ay dahil sa kanyang meeting sa noon kay executive secretary na si Vic Rodriguez. Iginiit daw ni Liza na binigyan pa siya ni Presidente Digong ng bagong three year appointment bago iyon bumaba sa puwesto na inaasahan naman niyang kikilalanin ni PBBM. 

Kaso nga hindi, at pinayagan lang siya ng executive Secretary na makapanatili sa puwesto hanggang sa lumabas ang official appointment ni Pip bilang chairman. Iyon umano ang dahilan kung bakit gusto niyang i-delay ang appointment. May nakatakda pa siyang biyahe patungo sa Cannes France. Pero hindi na rin nangyari iyon. Una hindi na siya makakapirma ng kahit na anong order at maging mga tseke ng FDCP kung mayroon mang babayaran dahil may kapalit na siya at para sa ibang sangay o ahensiya ng gobyerno wala na siya sa puwesto. 

Pero sa kanyang bagong statement pinasinungalingan niya ang lahat ng iyon. Mas magiging maliwanag iyan sa paglalabas niya ng isang official statement.