Alisah Bonaobra, pinuri sa ganda ng version ng Hanggang Kailan

ALAM MO NA!
ni Nonie Nicasio

SA ginanap na mediacon ni Alisah Bonaobra last Friday sa Pandan Asian Cafe sa Tomas Morato, para sa launching ng “Hanggang Kailan” na originally ay kinanta ni Angeline Quinto, sinagot niya ang tanong kung bakit dapat suportahan ang version niya ng award-winning composer na si Joel Mendoza?  

Pahayag ng talented na singer, “Why you should support my version of Hanggang Kailan? It’s because it’s a Composer’s Cut and it’s different from the original version. And because this is an OPM song,”

May pressure ba nang ini-revive niya ang kantang ito?

Tugon ni Alisah, “Ay, oo naman po! Kasi siyempre, ultimate idol ko po talaga si Angeline Quinto. And almost all her songs, kinakanta ko sa karaoke po. So nang sinabi sa akin na we will revive the song, grabe, sobrang speechless po ako.”

Aniya pa, “We recorded the track for six hours with Joel Mendoza as my vocal couch. Sir Joel’s intense body language while we were in the studio all pointed to achieving what’s best for our version.”

Tiniyak naman ni Joel na ibang-iba ang bagong version ng isinulat niyang kanta noong 2014 na “Hanggang Kailan.”

Ang naturang kanta ang ipinanlaban ng Kapamilya singer-actress na si Angline sa “Himig Handog P-Pop Love Songs” mahigit isang dekada na ngayon ang nakararaan.

Puring-puri naman ni Joel si Alisah sa ganda ng version nito ng Hanggang Kailan.

Wika ni Joel, “Magaling si Alisah. She is vocally good and there’s excellent communication and understanding while we’re recording. Masayang-masaya ako sa version ni Alisah.”

Ipinahayag pa ni Joel na dapat suportahan at pakinggan ang version ni Alisah dahil ibang-iba ito sa version ni Angeline.  “Please po pakinggan ninyo ang version ni Alisah. Kasi iyon po ang talagang gusto kong iparinig, iyong gusto kong i-share na istorya ng kanta, iyong kompleto. Hindi ‘yung nangyari sa version ni Angeline, na parang pinalitan ng producer yung lyrics, binago, and everything like that. At wala pong kasalanan si Angeline roon.

“Kasi mayroon po kaming limitation, four minutes for the contest (Himig Handog) and sabi po sa akin, hindi naman pang-radio ang version ni Alisah, especially ngayon, hindi na uso ‘yung radio, Spotify na po at digital na ang plarforms, sa YouTube and everything. So wala na po tayong limit na four minutes.”

Anyway, nagbalik sa bansa si Alisah makalipas ang ilang taong pananatili sa US para subukang ma-penetrate ang market doon para sa kanyang international career.

Si Alisah ay itinanghal na runner-up sa The Voice of The Philippines 2014 at three years later ay nagpakita ng husay sa X Factor UK and naging isa sa finalists dito.

Ang “Hanggang Kailan” ay mula sa San Francisco-based na RJA (Rosabella Jao-Arribas) Productions at distributed ng Star Music PH.