Pitong bagitong tulak, nalambat sa “tobats”

Hindi na pinayagan ng kapulisan na makapamayagpag pa ang pitong bagitong tulak at sunod-sunod na nila itong pinag-aaresto sa pinaigting pang operasyon sa Bulacan kamakalawa.

Sa ulat na ipinadala kay PColonel Relly B. Arnedo, Provincial Director of Bulacan PPO, sa isinagawang drug sting operations ay nagbunga sa pagkaaresto ng pitong tulak at pagkakumpiska ng kabuuang PP 295,520 halaga ng shabu at marked money.
Ang unang operasyon ay ikinasa ng SJDM CPS sa Brgy. Graceville, SJDM City, Bulacan, na nagresulta sa pagkaaresto kay Sherwin Dela Cruz, 41 at pagkakumpiska ng PhP 272,000 halaga ng shabu, may timbang na 40 gramo at marked money.
Sa bayan ng San Rafael, ang anti-drug operatives ng San Rafael MPS ay naaresto si Rodrigo Dionisio alyas Dary, 54 at Napoleon Ligamzon alyas Jay-jay, 48, sa Brgy. Ulingao, kung saan anim na pakete ng shabu na halagang PhP 3,400 at marked money ang nakumpiska.

Bukod sa iligal na droga, habang kinakapkapan, si alyas Jayjay ay nakumpiskahan din ito ng isang Cal.38 revolver na kargado ng apat na bala.
Samantala, ang Station Drug Enforcement Unit (SDEU) ng Sta. Maria, Bocaue at Hagonoy MPS ay naaresto si Marjay Espiritu, Reynaldo Gimeno, Edilberto Tuazon, at Rico Coronel matapos ang isinagawang drug trade.

Kabuuang PhP 23,120 halaga ng shabu at marked money ang nakumpiska ng mga operatiba sa mga bagitong tulak na hindi nila pinayagan pa na maging bigtime drug dealer.

Kaugnay nito, ang tracker teams ng Sta. Maria MPS, 1st at 2nd PMFC ay nadakip ang tatlong wanted na pugante na sangkot sa iba’t-ibang krimen sa ipinatupad na warrant of arrest. (MICKA BAUTISTA)