HATAW! D'yaryo ng Bayan hatawtabloid.com
MATAPOS ang maigsing tugisan ay naaresto ng pulisya ang isang lalaki na sapilitang tumangay sa motorsiklo ng isang residente sa San Jose del Monte City, Bulacan kamakalawa.
Sa ulat mula kay PLt.Colonel Ronaldo Lumactod Jr, hepe ng San Jose del Monte City Police Station (CPS), kinilala ang suspek na si Wenceslao Reyes na matagumpay na naaresto ng mga tauhan ng nasabing istasyon sa tulong ng ilang konsernadong mamamayan.
Napag-alamang ang insidente ay naganap nang ang motorsiklo ng biktima ay sapilitang tangayin ng suspek habang nakaparada sa labas ng kanilang bahay sa Brgy. Minuyan III, SJDM City.
Pero kaagad natunugan ng mga operatiba ng SJDM CPS ang pangyayari kaya agad silang nagresponde hanggang nagkaroon ng maigsing tugisan na pati ilang mamamayan ay tumulong na rin.
Naging matagumpay naman ang mga awtoridad na maaresto ang suspek na nasukol sa isang lugar at marekober ang kinarnap na motorsiklo. (MICKA BAUTISTA)
