ALLTV management tikom ang bibig sa paglayas daw ni Willie

SHOWBIZ KONEK
ni Maricris Valdez Nicasio

NAIBALITA ni Tita Cristy Fermin sa kanyang Showbiz Now Na na nag-resign na si Willie Revillame sa AllTV.

Anang batikang manunulat at host, ibinalita sa kanya ng kanyang source na sumulat na si Willie sa pamunan ng AllTV, ang AMBS2 para mag-resign.

Kaya naman agad namin itong tinanong sa AllTV management pero wala kaming natanggap na sagot mula sa kanila. Apat na kilala namin na may kaugnayan sa AllTV ang aming pinadalhan ng mensahe para makakuha ng statement ukol sa pinasabog na ito ni Tita Cristy pero seen zone lang kami.

Ayon pa kay Tita Cristy isa sa creative head ng ALLTV si Willie kaya napilitan itong umalis sa GMA 7 kahit napakaganda ng show nito roon.

Habang isinusulat namin ito’y wala pa rin kaming tugon na natatanggap ukol sa usaping ito. Pero bukas pa rin ang aming pahayagan sa anumang saloobin ng AllTV.