Mainlab, matawa, masaktan sa Kunwari…Mahal Kita

MALINIS, maganda ang pagkakagawa ng bagong pelikulang handog ng Viva Films ang Kunwari…Mahal Kita na pinagbibidahan nina Ryza Cenon, Joseph Marco, at Natalie Hart.

Palabas na ngayon sa mga sinehan ang Kunwari..Mahal Kita na idinirehe ni Roderick Lindayag.

Si Joseph si Greg Soriano, isang lalaking tumakas sa La Union matapos malaman na nais na ng asawang si Cindy Soriano (Natalie) na makipaghiwalay sa kanya.  Si Ryza naman si  Heidi “Hydes” Bolisay na nagtatrabaho sa resort na tinutuluyan ni Greg.

Hindi naging maganda ang unang pagkikita ng dalawa kaya naman sa takot na siya ay matanggal sa trabaho, pumayag si Hydes na maging tour guide ni Greg. At dahil  madalas magkasama hindi sinasadyang na-develop pareho sina Greg at Hydes.

Dito naman mare-realize ni Cindy na maha pa rin niya ang asawang si Greg kaya naman susundan niya sa La Union ang asawa. At dito na magkakaroon ng conflict. 

Kasama rin sa pelikula sina Yayo Aguila, Thou Reyes, Josh Colet, Eslove Briones, Charlize Paras, at Jerico Zuñiga.

Hindi na bago ang istorya ng Kunwari…Mahal Kita subalit maganda pa ring nailatag ni direk Roderick na hinaluan ng komedya ni Thou. Kapuri-puri ang galing ni  Thou kaya naman sa bawat bitaw nito ng dialogue, tumatawa ang audience. Kumbaga eh, klik na klik ang pagiging komikero niya sa pelikula.

May kanya-kanyang moment din ang tatlong bida na ipakita ang galing nila sa drama. Bagay kay Ryza ang pagiging tour guide gayundin si Nathalie bilang career-oriented wife ni Joseph. Na sa pagiging workaholic sobrang na-disappoint sa asawang artist at nasa bahay lang.

Umakma rin ang awitin ni Ogie Alcasid sa pelikula, ang Ikaw Sana.

Ang Kunwari…Mahal Kita ay isang pelikulang masarap panoorin kung gusto mong mag-relax, tumawa, mag-enjoy. Kaya watch na sa mga sinehan.