HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
MASUWERTE si Bianca Umali kay Ruru Madrid dahil tiniyak ng aktor na hindi siya babaero. Kahanga-hanga ang ginawang ito ng aktor para matiyak na kung sino ang mahal niya ngayon iyon lamang at wala nang iba. Wala ring dapat ipag-alala si Bianca na baka mahumaling pa sa iba ang kanyang boyfriend.
Pinaghahandaan na rin ni Ruru ang future nila ni Bianca dahil pagpapatayo na ito ng bahay.
Sa launching ng mga Sparkle artist bilang Beautederm ambassador noong Martes, March 7, natanong sa aktor kung totoong nagpapatayo na ito ng bahay para sa kanila ni Bianca?
Sagot ng aktor, “Yung isa po para sa pamilya ko. Iyon po ‘yung dream house ko for them.
“And then, after that, once na matapos ko na po ‘yun, ayun na, siyempre po para sa aking susunod na pamilya,”medyo nahihiyang pagbabahagi ni Ruru.
At nang igiit na kung si Bianca ba ang tinutukoy niyang “susunod na pamilya?” Siangot ito ni Ruru ng, “Yes. Hopefully.”
ibinahagi pa ni Ruru na unti-unti na niyang natutupad ang mga pangarap niya sa buhay kaya naman abot-langit ang pasasalamat niya sa GMA 7 at sa Sparkle dahil sa patuloy na tiwala at pag-aalaga sa kanya.
“Parang simula noong kumikita na ako, hindi naman kami galing sa mayamang pamilya, ayoko nang hayaang bumalik ‘yung buhay na nahihirapan na ang pamilya ko.
“Sinabi ko talaga sa simula na nagtrabaho ako, kahit na gaano ito nakakapagod, kahit na dugo’t pawis ang inaalay ko rito, okay lang sa akin basta mabigyan ko ng magandang buhay ‘yung pamilya ko at yung magiging pamilya ko na susunod sa buhay ko,” sambit pa ni Ruru.
Natanong din ang aktor kung hindi na siya babaero mula nang maging dyowa niya si Bianca, “Ay naku, hindi na talaga! Sobrang vocal kasi ako sa nararamdaman ko, eh. I mean, ‘pag may nagustuhan akong babae, sasabihin ko talaga.
“Siguro noong time kasi na ‘yun, single ako. So, puwede ko naman gawin ang mga bagay na gusto ko. Pero ngayon kasi, wala na, eh. Nakita ko na ang kahalagahan ng mga bagay na mayroon ako. Ayoko nang mawala yun,” sabi pa ni Ruru.
Isa pa sa itinuturing na mlaking blessing ni Ruru y ang pagiging bahagi ng Beautederm na kasama rin niya si Bianca bilang brand ambassador.
Ang iba pang celebrity endorser ng beauty and wellness company ni Ms. Rhea Anicoche-Tan mula sa Sparkle ng GMA ay sina Rayver Cruz, Cassy Legaspi, at Sanya Lopez. Ipinakilala rin sa mediacon ang mga bagong Kapuso stars na endorser na rin ngayon ng Beautederm skincare products, ito ay sina, Edgar Allan Guzman, Ysabel Ortega, Thia Tomalia, Patricia Tumulak, at Buboy Villar.
Sa isinagawng paglulunsad sa kanila sa Luxent Hotel sinabi ni MsRhea na napakaganda ng partnership nila sa Sparkle dahil never siyang nagkaproblema sa loob ng limang taon nilang collaboration.
“For me, beauty goes beyond the face. It is reflected in one’s soul. The intention of Beautéderm is not just to make people beautiful and glowing, but to extend hands to those in need, through the support and success of our resellers, distributors, and franchisees.
“What you do to the communities makes you beautiful. Recently, some of our scholars graduated with honors and that makes me extremely happy — that is the real measure of success — the number of hearts and lives you’ve touched,” sambit pa ni Ms. Rei.
